Bala\’s Blog

Archive for the ‘தமிழ்’ Category

அண்ணாந்து பார்

Posted by Bala on March 4, 2010


என்.சொக்கன் எழுதிய அண்ணாவின் ஒரு விரிவான வாழ்க்கை வரலாறு.

அண்ணாவைப் பற்றிய கதைகளை, சாதனைகளை நான் என்னுடைய சிறிய வயதிலிருந்தே கேட்டுள்ளேன். இதற்கு முக்கிய காரணமானவர் என் அப்பா, அவர் ஒரு தீவிரமான தி.மு.க தொண்டர். அண்ணாவைத் தன் சொந்த அண்ணாவாக ஏற்றுக்கொண்ட பல்லாயிரக் கணக்கான தம்பிகளில் என் அப்பாவும் ஒருவர். இருப்பினும் எனக்கு எப்போதும் அண்ணாவின் வாழ்க்கை வரலாற்றைப் படிக்க வேண்டும் என்று தோன்றியது இல்லை.

“குள்ளமான உருவம். ஆனாலும் அண்ணாந்து மட்டுமே பார்க்க முடிகிறது. அவரால் தொட முடிந்த சில உயரங்களை இன்று வரை இன்னொருவரால் நெருங்க முடியவில்லை. ஒரு விரிவான வாழ்க்கை வரலாறு” என்று புத்தகத்தின் முன் பக்கத்தில் பார்த்த உடன் இந்த புத்தகத்தைப் படிக்கும் ஆசை வந்தது. சென்னை புத்தகக் காட்சியில் வாங்கிய புத்தகங்களில் இதுவும் ஒன்று. வேலையின் பளு காரணமாக வாங்கிய புத்தகங்களை படிக்காமல் வைத்து இருந்தேன். கடந்த சில வாரங்களாக வாங்கிய புத்தங்களைப் படிக்க ஆரம்பித்தேன். மேலே சொன்ன காரணத்துக்காக இந்த புத்தகத்தை முதலில் படிக்க ஆரம்பித்தேன்.

ஒரு சில பக்கங்களைப் படித்த பின் மீண்டும் முதலில் இருந்து படிக்கும் ஆர்வம் அவ்வப்போது எழுந்தது. இதனால் புத்தகத்தை முழுவதும் படித்து முடிக்கும் முன்னரே இருமுறை முதலில் இருந்து படிக்க ஆரம்பித்தேன். அவ்வளவு எளிமையாகவும், அழகாகவும் எழுதியுள்ளார் சொக்கன் அவர்கள். இதில் வரும் பல சம்பவங்கள் என் அப்பா முலமாக ஏற்கனவே எனக்கு தெரிந்தவை என்றாலும் இப்புத்தகம் முதல் முறை படிக்கும் அனுபவத்தை அழகாக கொடுத்துள்ளது. சிறு வயதில் இருந்த அவருடைய குணாதியசங்களைப் பற்றியும், படிப்பில் அவருடைய ஈடுபாடுகள், அரசியலில் அவருடைய அணுகுமுறைகள் பற்றியும் மிகத் தெளிவாக எழுதியுள்ளார் சொக்கன். படிக்கும் காலத்தில் படிப்பை மட்டுமே கவனத்தில் வைக்க வேண்டும் என்ற கொள்கையை அண்ணா வலியுறுத்தியும் அதைக் கடைப்பிடித்தும் வாழ்ந்துள்ளார்.

அரசியல் நாகரீகம் என்றால் என்ன என்று தெரிந்து கொள்ள வேண்டும் என்றால் அண்ணாவின் வாழ்க்கையை அறிந்து கொண்டால் போதும். கலைத் துறையில் மிகவும் ஈடுபாடு கொண்ட அண்ணா, அதன் மூலம் சொல்ல வந்த கருத்துகளை மிகத் தெளிவாகவும், ஆணித்தரமாகவும் சொல்ல முடியும் என்பதை அறிந்து அதை நல்ல முறையில் உபயோகித்தவர். இந்த விஷயத்தில் பெரியார் அண்ணாவிற்கு எதிரான கருத்து கொண்டு இருந்தார் என்பது மிகவும் ஆச்சரியமூட்டியது.

அண்ணா-பெரியாரின் உறவை விளக்கிய விதம் அருமை. இது போன்ற இன்னொரு உறவை பார்க்க முடியமா என்பது அரிதே.

இப்புத்தகம், நீதிக் கட்சியிலிருந்து திராவிட முன்னேற்றக் கழகம் உருவானது வரையிலான சரித்திரத்தைத் தெளிவாக விளக்கியுள்ளது.

தி.மு.க 1967 பொதுத் தேர்தலில் வெற்றி பெற்ற பின், கட்சி ஆரம்பித்து 18 ஆண்டுகளுக்குள் ஆட்சிக்கு வருவது சரியா என்று எண்ணியுள்ளார் அண்ணா. காங்கரஸில் காமராஜர் போன்ற பெருந்தலைகள் தோல்வியைக் கண்டு வருத்தம் தெரிவித்து, எதிர் கட்சியில் அருகதை உள்ள நல்ல தலைவர்கள் இல்லாமல் போனதே என்றும் வருத்தம் தெரிவித்துள்ளார். இது போன்ற சம்பவங்கள் மூலம், அண்ணாவின் அரசியல் நாகரிகங்களைத் தெளிவாக படம் பிடித்துக் காட்டியுள்ளது இப்புத்தகம்.

தி.மு.கவின் ஆட்சியில் அண்ணாவின் சாதனைகளைப் பட்டியல் இட்ட போது இரண்டு ஆண்டுகள் தான் அண்ணா முதல்வராக இருந்தார் என்று என் அப்பா கூறியது எனக்குள் ஆச்சரியத்தை ஏற்படுத்தியது. அந்த ஆச்சிரியத்தை சொக்கன் அவர்களே இப்புத்தகத்தில் வெளிக்காட்டியுள்ளார்.

இப்புத்தகத்தின் பின் அட்டையில் “இனி ஆளுங்கட்சியாக இருந்தாலும் சரி. எதிர்க்கட்சியாக இருந்தாலும் சரி. அண்ணாவின் பெயரைச் சொல்லாமல் எந்தவொரு சக்தியாலும் இன்று அரசியல் செய்ய முடியாது” என்பது எவ்வளவு பெரிய உண்மை என்பதை புத்தகத்தை முடிக்கும் போது உணர்ந்தேன்.

இந்த புத்தகத்தை எழுதிய என்.சொக்கன் அவர்களுக்கும், பதிப்பித்த கிழக்கு பதிப்பகத்திற்கும் எனது நன்றி.

Advertisements

Posted in தமிழ், Books Review | Tagged: , | 7 Comments »

சென்னை சங்கமம் – 2010

Posted by Bala on January 12, 2010

புத்தகக் காட்சிக்கு சென்ற அதே நாளில் சென்னை சங்கமமும் துவங்கி இருந்தது. எதேர்ச்சையாக மெரினா கடற்கரை செல்லும் போது, சென்னை சங்கமம் விளம்பரங்களை தாங்கிய பேருந்துகள் கிராமிய கலைஞர்களின் ஆட்டம் பாட்டத்தினுடன் வந்து கொண்டு இருந்தது. அதை எனது மொபைலில் வீடியோ படம் எடுத்து வைத்தேன். அந்த வீடியோ உங்கள் பார்வைக்கு,

பேருந்தில் வந்தவர்களில் கையில் கடாயூத்துடன் வேடம் போட்டு இருந்தவர், பார்த்த அனைவரையும் கவர்ந்தார்.

கிராமிய கலைஞர்களை ஊக்குவிக்கும் இது போன்ற நிகழ்ச்சிகளை நான் பெரிதும் வரவேற்கிறேன்.

Posted in தமிழ், Personal | Tagged: | Leave a Comment »

சென்னை புத்தகக் காட்சி 2010

Posted by Bala on January 11, 2010

சென்ற வாரம் ஞாயிற்றுகிழமை (10-01-2010) அன்று 33வது சென்னை புத்தகக் காட்சி செல்ல வாய்ப்பு கிடைத்தது. இது வரை நான் அதிகமாக புத்தகங்கள் வாங்கியதும் இல்லை, படித்ததும் இல்லை. இதில் இருந்தே எனது இலக்கிய ஆவலை தெரிந்து கொள்ளலாம். அதற்கு காரணம் நான் வளர்ந்த சூழ்நிலை. ஆனால் 2008-ல் பொன்னியின் செல்வன் புத்தகத்தை வாழ்க்கையை நண்பன் சொல்வதை கேட்டு படித்தேன், அதன் பிறகு தான் புத்தகங்கள் படிக்கும் ஆர்வம் எனக்கு பிறந்தது, அதே வேகத்தில் பார்த்திபன் கனவு, என் இனிய இயந்திரா, மீண்டும் ஜீனோ, சுஜாதாவின் சிறு கதைகள் என்று தேடி படிக்க ஆரம்பித்தேன். ஏனோ, சில மாதங்களுக்கு பிறகு புத்தகங்கள் படிப்பது குறைந்தது. பல பதிவர்களின் நல்ல சிறுகதைகள் படித்ததின் தாக்கமாக இருக்கலாம். பதிவர்களின் கதைகளை படிக்க ஆரம்பித்த பிறகு, நல்ல பதிவுகளை தேடி படிக்க ஆரம்பித்தேன். வேலை பளு காரணமாக கடந்த சில மாதங்களாக அதுவும் குறைந்தது. சில நாட்களாக செந்தில் குமரன் எழுதி வரும் கிழக்கு பதிப்பக புத்தகங்களின் விமர்சனங்கள் மூலமாக என்னுள் மீண்டும் புத்தகம் படிக்கும் ஆவல் துளிர்த்தது. கடந்த வாரம் சென்னை செல்ல வாய்ப்பு கிடைத்ததால் புத்தகக் காட்சியை காண முடிவு செய்தேன். அங்கே சென்று கிழக்கு பதிப்பகத்தில் இருந்து பல புத்தகங்களை எடுத்தேன். என்னுடைய பொருளாதார பயத்தால் சில புத்தங்களை மனமில்லாமல் திரும்ப வைத்துவிட்டு, கையில் 7 புத்தங்கள் மட்டும் எடுத்து வந்தேன். இப்போது கையில் இருக்கும் 7 புத்தங்களை படித்து விட்டு அந்த அனுபவத்தை இங்கே எழுத ஆசை உள்ளது.

பார்போம் என்ன நடக்கிறது என்று!!!

வாங்கிய புத்தங்கள்:
1. ரமண சரிதம் – மதுரபாரதி
2. கி.மு. கி.பி. – மதன்
3. ஹிட்லர் – பா.ராகவன்
4. 1857 சிப்பாய் புரட்சி – உமா சம்பத்
5. அண்ணாந்து பார்! – என். சொக்கன்
6. சே குவேரா – மருதன்
7. இந்தியப் பிரிவினை: உதிரத்தால் ஒரு கோடு – மருதன்

பி.கு:1 – இது என்னுடைய முதல் தமிழ் பதிவு. தவறுகள் இருந்தால் மன்னித்து, சுட்டி காட்டினால் திருத்தி கொள்ள வாய்ப்பு கிடைக்கும்.
பி.கு:2 – எனக்கு தமிழ் பதிவு எழுத ரொம்ப நாள் ஆசை, ஆனால் கணிணியில் அமர்ந்தால் 2 வரிகள் அடித்த பிறகு என்ன அடிப்பது என்று தெரியாமல் முழிப்பேன். செந்தில் குமரன் சொன்ன யோசனையை கொண்டு முதலில் மனதில் தோன்றியதை வெள்ளை தாளில் எழுதி வைத்து பிறகு பதிவு இடுகிறேன். இந்த யோசனையை கூறிய செந்திலுக்கு நன்றி 🙂

Posted in தமிழ், Personal, Tamil | Tagged: , , | 4 Comments »